İclasda İƏT-in Baş katibi Hissein Brahim Taha tərəfindən ünvanlanan salamlama mətni səsləndirildi. Toplantıya sədrlik edən Dövlət Turizm Agentliyinin Aparat rəhbəri Kənan Qasımov, İƏT-in Azərbaycanın suverenliyinə və ərazi bütövlüyünə göstərdiyi davamlı dəstəyi xüsusi qeyd etdi. Qasımov vurğuladı ki, işğaldan azad edilmiş torpaqlar sayəsində ölkəmizin turizm potensialı daha da zənginləşib və Qarabağ artıq beynəlxalq səyahətçilər üçün cəlbedici, yeni turizm destinasiyası kimi tanıdılır.

O, bu iclasın, ötən il Azərbaycanın sədrliyi ilə keçirilmiş İƏT Turizm Nazirlərinin 11-ci Konfransı çərçivəsində qəbul edilmiş mühüm qərarların icra vəziyyətini və onların tətbiq məsələlərini müzakirə etmək baxımından son dərəcə faydalı olduğunu bildirdi.

Müzakirələr çərçivəsində İƏT-in “Turizm Şəhəri Mükafatı” üçün mövcud qiymətləndirmə meyarları barədə geniş fikir mübadiləsi aparıldı. Həmçinin, təşkilat tərəfindən müvafiq olaraq 2023 və 2024-cü illər üçün turizm şəhərləri seçilmiş Türkiyənin Şanlıurfa və Özbəkistanın Xivə şəhərlərinin fəaliyyət planları nəzərdən keçirildi və təsdiq edildi.

Toplantıda Şanlıurfanın zəlzələdən ciddi təsirlənmiş şəhərlərdən olduğu diqqətə çatdırıldı. İştirakçılar İƏT-in bütün müvafiq institutlarını, şəhərin yaxın gələcəkdə yenidən qurulmasından sonra turizm potensialının bərpası məqsədilə səmərəli proqram və layihələr hazırlamağa çağırıb.

İclas iştirakçıları, üzv dövlətlər arasında turizmin inkişafına dair qəbul edilmiş qətnamənin və “Turizmin inkişafı üzrə İƏT çərçivə sənədi”nin effektiv icrası ilə əlaqədar təqdimatlarla çıxış etdilər. Bu iclas regionda turizm əməkdaşlığının gələcəyi üçün mühüm bir platforma oldu.