Yenilənmiş “Mirvari” Kruizi ilə Bakı Gəmi Turu

Bakıya yeni gələn hər kəsin dilinin ucunda olan sual:

Xəzərdə gəmi turu mümkündür?

Qısa cavab: Təbii ki.

Məqsədiniz yelkənli qayıq və ya yaxta kirayələməkdirsə, bu da mümkündür. 

Və ya, Bakı-Türkmənbaşı və ya Bakı-Aktau istiqamətində bərə ilə səyahət istəyirsinizsə, yenə də cavab müsbətdir. 

Lakin bu cavablar şəhəri dənizdən seyr etmək və tərtəmiz dəniz havasını udmaq istəyənləri tam qane etmir.

Elə isə, axtardığınız sadəcə yarım saatlıq Bakı gəmi turudursa, bilməlisiniz ki, tam doğru ünvandasınız.

Bu yazıda siz, Bakı buxtasında fəaliyyət göstərən "Mirvari" gəzinti gəmisi haqqında aşağıdakı başlıqlar üzrə ətraflı məlumat əldə edəcəksiniz:

Gəmi haqqında ümumi məlumat;

Marşrut və cədvəl;

Tur üçün bilet qiymətləri və daha çoxu.

Başlayaq.

Dənizkənarı Milli Parkdan başlanan Xəzər Dənizi turu

Bakıda Gəmi turu 2024-cü ilin noyabrında - iki illik fasilədən sonra - yenidən fəaliyyətə başlayıb.

Bundan əvvəl, Bulvar ərazisində gəmi turları dənizdə su səviyyəsinin azalması səbəbilə dayandırılmışdı.

Əvvəllər sərnişin gəmisi Sadko körpüsündən yola düşürdü, indi isə Bakı Dəniz Vağzalının qarşısındakı platformadan çıxır.

Yəni, artıq dəniz gəzintisinə çıxmaq istəyirsinizsə, birbaşa Bakı Dəniz Vağzalına üz tutmalısınız.

Oraya "Sadko" körpüsünün yanından gəlmək istəsəniz, piyada təxminən 800 metr yol getməlisiniz.

Dəniz vağzalından başlayan gəmi turu, Ağ şəhər ətrafından keçərək 30 dəqiqədən çox davam edir.

Tur hər gün saat 14:00-dan 21:00-a qədər, bayram günləri daxil olmaqla, hava şəraiti əlverişli olduqda keçirilir.

Qeyd 1: Bakı Gəmi turlarının hərəkət qrafiki barədə yenilənmiş və dəqiq məlumat almaq üçün Bakı Bulvarının rəsmi saytına baxmaq tövsiyə olunur. Çünki yay və qış aylarında saatlarda dəyişiklik ola bilər.

“Mirvari” kruiz gəmisi haqqında

Mirvari (2013-cü ildən fəaliyyət göstərir) - Bakı Bulvarında fəaliyyət göstərən ən böyük sərnişin gəmisidir. Eyni vaxtda 450-460 nəfər sərnişin daşıya bilir.

Gəmi üç göyərtədən ibarətdir.

Yenilənmə işlərindən sonra birinci göyərtə də artıq sərnişinlərin istifadəsinə açıqdır. Burada Xəzərin mavi sularını daha yaxından seyr edə və unudulmaz fotolar çəkə bilərsiniz.

Gəmiyə daxil olduqda sizi klassik musiqi fonunda nahar edə biləcəyiniz gözəl bir restoran qarşılayır.

İkinci göyərtədə sərnişin oturacaqları ilə yanaşı kiçik kafe də var. Burada isti çay və ya qəhvə içib yüngül qəlyanaltı və şirniyyatlardan dada bilərsiniz.

Yeri gəlmişkən, öz yeməyinizi gətirmə bilərsiniz; bununla bağlı heç bir məhdudiyyət yoxdur.

Son olaraq, VIP salon və əlavə sərnişin oturacaqları üçüncü göyərtədə yerləşir.

Qeyd 2: Təəssüf ki, əvvəllər fəaliyyət göstərən “Şəfəq” adlı kiçik sərnişin gəmisi (60 nəfərlik) artıq işləmir.

Bakı Gəmi turu: Biletlər və qiymətlər

2025-ci il üçün “Mirvari” ilə gəmi turunun qiymətləri belədir:

• Standart bilet - 5 AZN (təxminən 3 ABŞ dolları)

• VIP bilet - 10 AZN (təxminən 6 ABŞ dolları)

6 yaşına qədər uşaqlar üçün giriş tamamilə pulsuzdur.

Biletləri birbaşa platformadakı “Kassa” dan əldə edə bilərsiniz.

Hazırda biletləri öncədən almaq mümkün deyil, yalnız yerində (kassada) satış həyata keçirilir.

Son qeyd: 2024-cü ilin noyabrında, "Mirvari" gəmisinin yenidənqurmasından sonraki ilkin turlarda, şənbə-bazar günləri 11:00-dan 13:00-dək 30 AZN (18 USD) məbləğində geniş çeşidli səhər yeməyi xidməti mövcud idi. Ümidvaram ki, bu təklif hələ də qüvvədədir.

Bütün bu deyilənlərlə, sonda demək istəyirəm ki, bu qısa Bakı gəmi gəzintisi, dənizi seyr etmək üçün əla imkandır. 

Məsləhətdir ki, Bakıda gəzməli yerlər siyahınızda bu tura yer verəsiniz. Həm ucuzdur, həm də gözəl mənzərəsi var. 

İnanın, heç nə itirməyəcəksiniz. 

Bakı səyahətinizi planlaşdırmaqda köməyə ehtiyacınız var? Onlayn rezervasiya üçün bizimlə bu nömrə vasitəsilə əlaqə saxlayın » +994 992 72 22 27.